तुषारकी

  मोरपिशी 　आज, २२ ऑक्टोबर. अमेरिकेत हा दिवस नॅशनल कलर डे म्हणून साजरा केला जातो. रंगांच्या दुनियेत रमण्याचं माणसाला भारी वेड! नुकतीच नवरात्र संपली. नऊ दिवस नऊ रंगांचे कपडे घालून अनेकांनी उत्सवाचा आनंद घेतला. सोशल मीडियावर रंगीबेरंगी छायाचित्रांची रेलचेल होती.  लाल, पिवळा, हिरवा, गुलाबी, जांभळा... प्रत्येक रंगाचा आपला थाट! याच रंगांच्या यादीत एक दिवस ‘मोरपिशी’ रंगाचाही होता. नाव ऐकताच डोळ्यांसमोर मोराचा देखणा पिसारा उभा राहतो. पण ज्याला आपण मोरपिशी रंग म्हणतो तसा मोरपिसांचा रंगचं नसतो. “खरं तर मोरपिसाचा मूळ रंग तांबूस किंवा तपकिरी असतो!” पण मग आपल्या डोळ्यांना सुखावणारा मोरपिशी रंग येतो कुठून? 　पावसाळ्यात रस्त्यावरच्या एखाद्या खड्ड्यात पेट्रोल किंवा तेलाचा पातळ तवंग पसरलेला दिसतो. (अलीकडे असे खड्डे सहज पाहायला मिळतात!) त्यावर निळे, हिरवे, जांभळे, पिवळसर रंग चमकू लागतात. जणू इंद्रधनुष्याचा एक तुकडाच पाण्यावर उतरला आहे! हे रंग तेलात कुणी मिसळलेले नसतात. सूर्यप्रकाश तेलाच्या पातळ थरावर पडतो, तेव्हा त्यातील काही प्रकाशकिरण परत आपल्या डोळ्यांपर्यंत पोहोचतात. तेलाच्या थराची जाडी आणि ...